Il-proġett li se jeqred 48,000 metru kwadru ta’ art agrikola, joqtol iktar minn 600 siġra, jiżola 1,200 ruħ u jkeċċi 47 bidwi – filwaqt li ma jsolvi assolutament xejn -għadu kemm għadda mill-Bord tal-Awtorità tal-Ippjanar bi 3 vota kontra u 9 favur.

Bħal m’għamel f’tad-db, ir-rappreżentant tal-awtorità li suppost tħares l-ambjent (l-ERA), il-Professur Victor Axiak (fir-ritratt), ivvota favur il-proġett.

Ma konna qed nistennew xejn differenti. Nafu li dan il-Bord huwa sempliċiment pupazz ta’ poteri ħafna ikbar. Anzi, jekk xejn, din kienet seduta li tatna ħafna kuraġġ, għaliex ir-residenti, l-bdiewa u l-ambjentalisti attendew bi ħġarhom, għamlu argumenti li ma seta’ jmerihom ħadd u wrew li huma forza qawwija.

Il-ġlieda ma tiqafx hawn. Nemmnu li bil-parteċipazzjoni ta’ kulħadd hawn is-saħħa biex din id-deċiżjoni traġika tiġi appellata.