Il-fatt li l-Prim Ministru ilbieraħ filgħaxija (2 ta’ Mejju, l-għada ta’ Jum il-Ħaddiem) stqarr li l-Maltin m’għandhomx jagħmlu ċertu xogħlijiet għax iqis dawn ix-xogħlijiet bħala inferjuri, u għalhekk għandhom isiru mill-barranin, għandu jiġi kkundannat minn kulmin għandu ħjiel ta’ prinċipji xellugin u Soċjalisti. Din it-tip ta’ mentalità hija l-oppost ta’ dak li dejjem iġġieled għalih is-Soċjaliżmu. Is-Soċjaliżmu dejjem tħabat sabiex KULL xogħol ikun dinjituż, KULL ħaddiem jigi stmat irrispettivament mill-oriġini tiegħu, għaliex KULL xogħol u KULL ħaddiem huwa meħtieġ u importanti.
Huwa ferm inkwetanti li dan it-tip ta’ argument klassista u razzista qed jintuża sabiex jiġġustifika il-kundizzjonijiet tax-xogħol u l-pagi diżastrużi li hawn f’ċertu setturi hawn Malta. Minflok ma l-Gvern jintervjeni biex itejjeb dawn il-kundizzjonijiet, billi pereżempju jgħolli l-paga minima, dan qed jaqdi l-interessi tan-negozji l-kbar billi jagħti l-impressjoni li l-barranin jistgħu jiġu sfruttati għaliex huma ta’ “inqas valur” mill-Maltin.
Iżda b’pagi baxxi u b’kundizzjonijiet tax-xogħol ħżiena ibatu l-ħaddiema kollha – Maltin u barranin. Huwa skifuż li tipprova tifred lill-ħaddiema abbażi tan-nazzjonalità biex tipproteġi l-interessi tal-ftit sinjuruni li qed jisfruttaw lill-ħaddiem biex iħaxxnu bwiethom.
